വത്തയ്ക്കപ്പാട്ട്

ഉരുണ്ടുരുണ്ടൊരു വത്തയ്ക്ക,
പച്ചച്ച തോലുള്ള വത്തയ്ക്ക,
ഉള്ളിൽ ചോപ്പുള്ള വത്തയ്ക്ക,
കറുകറെ കുരുവുള്ള വത്തയ്ക്ക,
അമ്മാമൻ കൊണ്ടോന്നു വത്തയ്ക്ക,
അമ്മായി മുറിച്ചൂ വത്തയ്ക്ക
മക്കളു തിന്നൂ വത്തയ്ക്ക,
മരുമക്കളു തിന്നൂ വത്തയ്ക്ക,
വെള്ളം നിറഞ്ഞൊരു വത്തയ്ക്ക,
മധുരം നിറഞ്ഞൊരു വത്തയ്ക്ക,
വത്തയ്ക്ക തിന്നിട്ടെല്ലാരും,
ഉറങ്ങാൻ നോക്കും നേരത്ത്,
മാനത്തു കണ്ടൂ വത്തയ്ക്ക,
പാതി മുറിച്ചൊരു വത്തയ്ക്ക,
മഞ്ഞനിറത്തിലെ വത്തയ്ക്ക,
ആരോ പറഞ്ഞു വത്തയ്ക്കയല്ലത്
അമ്പിളിമാമനാ കുട്ട്യോളേ.