അമ്മ പറയുന്നത്

ശാഠ്യം പിടിക്കാതുറങ്ങുനീയോമലേ,
താരാട്ടു പാടുവാൻ വയ്യെനിയ്ക്ക്.
അമ്പിളിമാമനുണ്ടാകാശമുറ്റത്ത്,
നീയുറങ്ങുന്നതും നോക്കിനിൽപ്പൂ.
നിൻ കണ്ണിണയിലെ ദീപപ്രഭകണ്ടു,
താരകക്കൂട്ടങ്ങൾ ലജ്ജിക്കുന്നു.
നിലാവു നിൻ ചുണ്ടിലെ പുഞ്ചിരി കാണവേ,
സ്വയമൊന്നു വീണ്ടും മിനുക്കീടുന്നു.
കുളിർത്തെന്നലെങ്ങുനിന്നോ വന്നണയുന്നു,
നിന്നെത്തണുപ്പിച്ചകന്നീടുന്നു.
മാറോടു ചേർത്തണച്ചമ്മയുറക്കിടാം,
അല്ലലറിയാതുറങ്ങിക്കൊൾക.
നാളെകൾ നിന്റേതാണമ്മ പ്രാർത്ഥിച്ചിടാം,
ദൈവം നിനക്ക് തുണയായിടും.