വര്‍ണ്ണപ്പൂന്തോട്ടം

കുഞ്ഞുമണ്‍ചട്ടിയില്‍ മഞ്ഞപ്പൂ,

ഇന്നലെ വിരിഞ്ഞൊരു ജമന്തിപ്പൂ.

തലയാട്ടി നില്‍ക്കുന്ന തുളസിച്ചെടി,

ഇലമാത്രമായൊരു റോസാച്ചെടി.

പലപലവര്‍ണത്തില്‍ ചെമ്പരത്തി,

പലനാളായുള്ളൊരു പാരിജാതം.

അവിടുന്നും, ഇവിടുന്നും, കൂടെ വന്ന,

പേരറിയാത്തൊരാ കുഞ്ഞുപൂക്കള്‍.

നീളത്തില്‍, ഉയരത്തില്‍, മുല്ലപ്പൂവും,

രണ്ടുവര്‍ണങ്ങളില്‍ തെറ്റിപ്പൂവും.

തോട്ടം നനയ്ക്കാന്‍ മഴ വരുമ്പോള്‍,

പുഞ്ചിരി തൂകുമീ പൂക്കളൊക്കെ.

ചിത്രശലഭങ്ങള്‍ വന്നിരിക്കും,

വണ്ടുകള്‍ പാറിപ്പറന്നു വരും.

കുഞ്ഞിളം കൈയ്യുകള്‍ കുസൃതി കാട്ടി,

പൂ‍വിനെ നുള്ളിപ്പറിച്ചെടുക്കും.

മഞ്ഞു കുളിരേകി വന്നു നില്‍ക്കും,

സൂര്യന്‍ ജ്വലിക്കുമ്പോള്‍ വാടി നില്‍ക്കും.

മിന്നുവിന്‍ മുറ്റത്തെയാ പൂന്തോട്ടം,

വര്‍ണ്ണങ്ങള്‍ തീര്‍ക്കുന്ന മായാജാലം.