ചോദ്യങ്ങൾ

കുറച്ചു വൈകി വന്നാലെന്താന്ന്,
ഇടയ്ക്ക് മറഞ്ഞുപോകാതെ എപ്പഴും പുഞ്ചിരിച്ചാലെന്താന്ന്,
എന്നും മുഴുവനായി നിറഞ്ഞുനിന്നാലെന്താന്ന്,
തോന്നുമ്പോഴൊക്കെ കാണാൻ പറ്റിയാലെന്താന്ന്,
എന്നും ചിരിതൂകി നിന്നാലെന്താന്ന്,
ഓർക്കുമ്പോൾ ഒന്നെത്തി നോക്കിപ്പോയാലെന്താന്ന്,
ഇടയ്ക്കൊന്ന് വന്ന് കുളിർപ്പിച്ചു പോയാലെന്താന്ന്,
എപ്പഴും മുഖം തെളിഞ്ഞുനിന്നാലെന്താന്ന്,

സൂര്യനോട്
നക്ഷത്രങ്ങളോട്
ചന്ദ്രനോട്
മഴവില്ലിനോട്
നിലാവിനോട്
മഴയോട്
കാറ്റിനോട്
ആകാശത്തോട്

ചോദിക്കണമെന്നുണ്ട്.
പക്ഷേ,
ഇതൊക്കെ ചോദിക്കാൻ നീയാരാന്നൊരു
മറുചോദ്യം കേൾക്കാൻ വയ്യ
അത്രതന്നെ.