നക്ഷത്രങ്ങളെപ്പോലെയാണ്

നിനക്ക് പകലിനേക്കാൾ തിരക്കാണ്,
ഓടിയോടി കൂടണയാനുള്ള തിരക്ക്.
നിനക്ക് രാത്രിയേക്കാൾ തിരക്കാണ്,
ഓടി മറഞ്ഞ് വെളിച്ചത്തെ ജോലിയേല്‍പ്പിക്കാനുള്ള തിരക്ക്.
ഭൂമിയുടെ വ്യാപ്തിയും
ആകാശത്തിന്റെ ഉയരവും
കടലിന്റെ ആഴവും
ലജ്ജിക്കുന്ന തരത്തിലാണ് നിന്റെ സ്നേഹം പ്രതീക്ഷിക്കുന്നത്.
നട്ടുച്ചയിലെ സൂര്യനെപ്പോലെ ജ്വലിച്ചു തളർത്തിയും
അമാവാസിയിലെ ചന്ദ്രനെപ്പോലെ മറഞ്ഞുനിന്നും
നീയെന്നെ അവഗണിക്കുന്നു.
എന്നിട്ടും
നക്ഷത്രങ്ങളെപ്പോലെയാണ്
പ്രണയമെന്ന് ഞാൻ!
ചിലപ്പോൾ തെളിഞ്ഞുകണ്ട്
ചിലപ്പോൾ മറഞ്ഞുനിന്ന്.