പുതുവര്‍ഷം

പിന്നിലായ് പോയ്മറഞ്ഞൂ,
വീണ്ടുമൊരു വര്‍ഷംകൂടെ.
പിന്നിട്ടുപോന്നിരുന്നത്,
പൊന്നായിരുന്നുവോ!
നേരമില്ലെന്നാകിലും,
പിന്തിരിഞ്ഞുനോക്കണം.
പതിരും പൊന്നും വേറെയായ്,
നോക്കിയെടുത്തുവയ്ക്കണം.
ഇന്നലെക്കണ്ട സ്വപ്നങ്ങള്‍,
ഇന്നിലും കൂടെ വന്നേയ്ക്കും.
ഭാരമാകുമെന്നോര്‍ത്ത്,
കളയാതെയിരിക്കണം.
ഓര്‍മ്മതന്‍ ഭാണ്ഡക്കെട്ടുകള്‍,
മറക്കാതെ ചുമക്കേണം.
സ്നേഹം തന്ന വഴിയിലൂടൊന്നു-
കൂടെ കറങ്ങേണം.
ദ്രോഹത്തിന്‍ കനലുകളില്‍,
മനസ്സുവാടാതെ നോക്കണം.
ഇന്നലെയെന്ന വാഹനത്തില്‍നി-
ന്നിറങ്ങിവന്നെന്നോര്‍ക്കണം.
നാളെയെന്ന വാഹനം,
ദൂരെയാണെന്നോര്‍ക്കണം.
ഇന്നിന്റെ വാഹനത്തില്‍,
‍തിരക്കാണെങ്കിലും കയറണം.
ഇതാണ് പുതുവര്‍ഷം.
പതിരാവാതെ നോക്കിടാം.
പഴകിത്തീരും മുമ്പേ,
പൊന്നാക്കിമാറ്റിടാം.