തെറ്റിയ കണക്ക് ----4

അവനും അവളും.

വല്യ ഇഷ്ടം.

വില്ലന്‍ വന്നു.

കാലന്‍!

അവനെക്കൊണ്ടുപോകാന്‍.

ചെത്തുപയ്യന്മാര്‍ ബൈക്കില്‍ നിന്നിറങ്ങി കീച്ചെയിന്‍ കൈയിലിട്ട്‌ ചുഴറ്റുന്നതുപോലെ കയറു ചുഴറ്റി , പോത്തിന്റെ പുറത്തു നിന്നും ഭൂമിയിലേക്ക്‌ ലാന്‍ഡ്‌ ചെയ്തു. വീരപ്പനെ കണ്ടതില്‍പ്പിന്നെ മീശ പിരിക്കുന്നത് ഉപേക്ഷിച്ചിരുന്നു. പേടിച്ചിട്ട്.

അവള്‍ തടഞ്ഞു.

കാലന്‍ പറഞ്ഞു-" കൊണ്ടുപോകും. അതുറപ്പ്‌. അതിനു പകരം നിനക്കൊരു വരം ചോദിക്കാം. പക്ഷെ ഇവനെ കൊണ്ടുപോകരുത്‌, നീ മരിച്ചിട്ടേ അവന്‍ മരിക്കാവൂ, എന്നൊക്കെയുള്ള തട്ടിപ്പുവരം ചോദിക്കരുത്‌. തരില്ല”.

“ഉം”. അവള്‍ക്ക്‌ സമ്മതിക്കാതെ തരമില്ല.

“സമയം കളയാതെ ചോദിക്കൂ.”

അവള്‍ വരം ചോദിച്ചു "രാഷ്ട്രീയപ്പാര്‍ട്ടികള്‍ എന്ന് വിഭജനം നിര്‍ത്തുന്നോ അന്നേ ഞങ്ങളെ തമ്മില്‍ പിരിക്കാവൂ".

കാലന്‍, പോത്തിനോട്‌ "ഫോളോ മി " എന്നും പറഞ്ഞ്‌ കയര്‍ സ്വന്തം കഴുത്തിലിട്ട്‌ ഒറ്റ ഓട്ടം.

അവള്‍ക്ക്‌ സന്തോഷം കൊണ്ട്‌ കണ്ണുകാണാതെ ആയി. അവന്റെ മൂക്കിന്‍ തുമ്പത്തൊന്ന് തൊടണമെന്ന് അവള്‍ക്ക്‌ ആഗ്രഹം ഉണ്ടായിരുന്നു. പക്ഷെ മൂക്കിന്‍ തുമ്പത്തല്ലേ ദേഷ്യം. എന്ത്‌ ചെയ്യാന്‍...