കാരറ്റ് കുമ്പളങ്ങയോട് പറയാതിരുന്നത്

പാതി മുറിഞ്ഞ് വേദനിച്ച്
വട്ടത്തിലിരിക്കുന്ന കുമ്പളങ്ങ
അരികത്തിരിക്കുന്ന കാരറ്റ്
കുമ്പളങ്ങയോട് പറഞ്ഞത്
“ഇപ്പൊക്കണ്ടാൽ ആകാശം പോലുണ്ട്,
കുരുക്കൾ നക്ഷത്രങ്ങളും.” എന്ന്.
വെറും ആശ്വാസവാക്കുകളെന്ന്
തെറ്റിദ്ധരിക്കുമോന്ന് ഭയന്ന്
കൂടുതലായി പറയാൻ വന്ന വാക്കുകൾ
കാരറ്റ് മനസ്സിലൊളിപ്പിച്ചു.
നിന്റെയടുത്തിരിക്കുമ്പോളാണ്
എനിക്ക് കൂടുതൽ ചുവപ്പെന്ന്,
പ്രണയമാണതിനു കാരണമെന്ന്.