വിഷു

മിഴികൾ പതുക്കെ തുറന്നൊന്നു നോക്കുമ്പോൾ,
മുന്നിൽത്തെളിയുന്നു വർണ്ണക്കണിക്കൊന്ന.
മണ്ണിന്റെ മണവുമായ് കണിവെള്ളരിക്കയും,
മിന്നുന്നു മുന്നിലായ് സ്വർണ്ണവും വെള്ളിയും,
ചക്കയും മാങ്ങയും, അരിയും പഴങ്ങളും,
നാളികേരത്തിൽ ജ്വലിക്കുന്ന ദീപവും,
കള്ളച്ചിരിയുമായ് കണ്ണനാമുണ്ണിയും,
പുതിയൊരു പുലരിയിൽ സ്വാഗതമോതുന്നു.
ശബ്ദം പൊഴിച്ചും, നിശബ്ദമായും,
പടക്കങ്ങൾ, പൂത്തിരികൾ ചിന്നിച്ചിതറുന്നു.
കൈനീട്ടവും വാങ്ങി കൈകൾ നിറയ്ക്കുമ്പോൾ,
മനസ്സുനിറച്ചു വിഷു വീണ്ടുമുണരുന്നു.
ഇനിയൊരു വിഷുക്കണി കാണും വരേയ്ക്കും,
മനസ്സിലും കണ്ണിലും കാഴ്ചകൾ നിറയ്ക്കുന്നു.