പാവം

പുലരിയിൽ വന്നണയുന്ന സൂര്യനെക്കാണുവാൻ
പതിവായി മൺ‌കട്ട കാത്തിരുന്നു.
സൂര്യനുദിച്ചു നടന്നുതുടങ്ങുമ്പോൾ
മൺകട്ടയെന്തിനോ സന്തോഷിച്ചു.
ഒരുനാൾ, എന്നെങ്കിലുമൊരുനാളിൽ സൂര്യൻ
തന്നെയും കാണുമെന്നാശ്വസിച്ചു.
സൂര്യൻ വരുമ്പോൾ ചിരിക്കുന്ന പൂക്കളും
ചെടികളും, മൺകട്ട കണ്ടുനിന്നു.
സൂര്യനവരുമൊത്തുല്ലസിച്ചാറാടി,
ഒടുവിൽ കടലിൽ മറഞ്ഞുപോകും.
സൂര്യനോടൊപ്പം ചിരിച്ചുമിണ്ടുന്നത്
നിത്യവും മൺകട്ട സ്വപ്നം കണ്ടു.
പറയാതെയറിയാതെ വന്നൊരു മഴയിൽ
പാവമാ മൺകട്ടയലിഞ്ഞുപോയി.
മഴ പോയൊളിച്ചനാൾ വീണ്ടുമെത്തീ സൂര്യൻ
മൺകട്ട കാത്തിരിപ്പില്ലെന്നാലും.