നമുക്ക് കഴിയുന്നത്

യേശു ചെയ്തതൊക്കെ തനിക്കും ചെയ്യാനാവുമെന്ന് മാജിക്കുകാരന്‍. അപ്പം വീതിച്ചുനല്‍കാനും, വെള്ളം വീഞ്ഞാക്കാനും, തന്റെ മാജിക്കിലൂടേയും സാധിക്കുമെന്ന്.
ആരോ ചോദിച്ചു. “വിശ്വസിക്കുന്നവര്‍ക്ക് സമാധാനം നല്‍കാന്‍ പറ്റുമോന്ന് ചോദിക്കുന്നില്ല. വിശ്വസിച്ചുനോക്കട്ടെ എന്നാവും ഉത്തരം. പക്ഷെ, ലോകത്ത് എല്ലായിടത്തും ഒരു ഷോയെങ്കിലും പൈസ വാങ്ങാതെ ചെയ്യാന്‍ പറ്റുമോ?”
മാജിക്കുകാരന്‍ ഓടിയ വഴിയിലെ പുല്ലുമുളപ്പിക്കാന്‍ യേശു തന്നെ വരേണ്ടിവരും.

മറ്റുള്ളവരെ അനുകരിച്ച്, എല്ലാം തോന്നിയപോലെ ചെയ്യുന്നതിലല്ല മിടുക്ക്. തനിക്ക് ചെയ്യാന്‍ കഴിയുന്നത് നന്നായി ചെയ്യുന്നതിലാണ്. മറ്റുള്ളവരെപ്പോലെയാവാന്‍ ശ്രമിക്കുന്ന സമയം കൊണ്ട്, നമുക്ക് ചെയ്യാന്‍ കഴിയുന്ന കാര്യങ്ങള്‍ ചെയ്ത് നമുക്ക്, നമ്മളായിരിക്കാം.