സ്നേഹം

പ്രിയപ്പെട്ടവരേ,

അതായത് ഇക്കൊല്ലം ജനുവരി മുതൽ ഡിസംബർ വരെ സമയം ഒരു പാച്ചിലങ്ങോട്ട് പാഞ്ഞ്. ഹിഹി. കൂടെ ഞാനും.  ഇക്കൊല്ലം സമയം പോയത് അറിഞ്ഞില്ല.  ദൈവത്തിന്റേം  കൂട്ടുകാരുടേം ഒക്കെ  ഇടപെടലാണ് അതിനു സഹായിച്ചത്. ദൈവത്തിനു നന്ദി. കൂട്ടുകാർക്കോ? ഹും. ചോദിച്ചതോണ്ട് കൊടുത്തേക്കാം. എല്ലാവർക്കും നന്ദി.  ദൈവം നിങ്ങളേം രക്ഷിക്കട്ടെ.

ഇനി ക്രിസ്തുമസ്സിനും പുതുവർഷത്തിനുമൊക്കെ കുറച്ചു ദിവസങ്ങളേയുള്ളൂ.  കേക്കൊക്കെ  ഉണ്ടാക്കണം. ഞാനല്ല. നിങ്ങള്.  ഞാൻ മേടിച്ചോണ്ടുവരാം. തെരക്കാണ് മക്കളേ. (അല്ലെങ്കിപ്പിന്നെ ഉണ്ടാക്കി;))

എന്തായാലും ഒരു ഉപദേശം തരാം. അതിനു ചെലവൊന്നുമില്ലല്ലോ. ആരെയെങ്കിലും പുച്ഛിക്കേം പരിഹസിക്കേം ഒരു പരിധിവരെയേ ആകാവൂ. നേരിട്ടു കാണുന്നില്ലല്ലോ എന്നാ അരക്കിലോ പുച്ഛം ചൊരിഞ്ഞേക്കാംന്നു വിചാരിച്ചാ നേരിട്ടെന്നെങ്കിലും കാണേണ്ടിവന്നാലോ? നിങ്ങളൂഹിച്ചെടുത്ത ആളേ ആയിരിക്കില്ല ഇപ്പുറത്ത്. ആലോചിച്ചിട്ടുണ്ടോ? ഇല്ലെങ്കി സമയം കിട്ടുമ്പോ ആലോചിച്ചോളീൻ.  അപ്പോ ശരി.

എല്ലാവർക്കും  സ്നേഹം. ക്രിസ്തുമസ് - പുതുവത്സരാശംസകൾ!

അതായത്

എന്തൊക്കെയോ എഴുതിനിറയ്ക്കണം എന്നൊക്കെ വിചാരിക്കും. എന്ത്! ഒന്നുമില്ല. ദൈവകൃപകൊണ്ട് സുഖമായി ഇരിയ്ക്കുന്നു. എല്ലാവരും അങ്ങനെയെന്നു കരുതുന്നു.

അപ്പോ ശരി

ബൂലോക  കൂട്ടുകാർക്കൊക്കെ സുഖമെന്നു കരുതുന്നു. എല്ലാവരും തിരക്കിലായിരിക്കുമല്ലോ അല്ലേ? പിന്നെ, എന്തൊക്കെയാണ്  വിശേഷങ്ങൾ?  ഇപ്പോ ആരും മീറ്റും ഈറ്റും ഒന്നും നടത്താറില്ലേ? ഏയ്...വന്നു കാണാൻ വേണ്ടീട്ടൊന്നുമല്ല. വെറുതെ ഒരു ലോഗ്യം ചോദിച്ചതാണ്. ഇവിടെ പ്രത്യേകിച്ചൊന്നുമില്ല. വല്യ യാത്രകളൊന്നുമില്ല. പുസ്തകം വായന ഉപേക്ഷിച്ചിട്ടൊന്നുമില്ല. സിനിമയും. ബ്ലോഗും ഉപേക്ഷിച്ചിട്ടില്ല. ബൂലോഗത്തിലെ ആരേയും മറന്നിട്ടുമില്ല.

യാത്രകളെക്കുറിച്ച്, വായിക്കുന്ന പുസ്തകങ്ങളെക്കുറിച്ച്, സിനിമകളെക്കുറിച്ച്, ജീവിതത്തെക്കുറിച്ച് ഒക്കെ ഇനിയും പഴയപോലെ എഴുതണമെന്നൊക്കെയുണ്ട്. തൽക്കാലം സാധിക്കുന്നില്ല. അപ്പോ ശരി. നിങ്ങളെയൊന്നും ബോറടിപ്പിക്കുന്നില്ല.

എല്ലാവരും സന്തോഷമായും സുഖമായും ഇരിക്കൂ.

അത്രേള്ളൂ

കേരളം വെള്ളപ്പൊക്കദുരിതത്തിൽ നിന്നും കരകയറിക്കൊണ്ടിരിക്കുകയാണ്. പലനാട്ടിൽ നിന്നും ജനങ്ങൾ സഹായങ്ങൾ നൽകിക്കൊണ്ടിരിക്കുന്നു. എല്ലാ നല്ല മനസ്സുകൾക്കും ഒരു മലയാളി എന്ന നിലയിൽ ഞാൻ നന്ദി പറയുന്നു. അവരെന്റെ ബ്ലോഗ് കാണുന്നില്ലെങ്കിലും, ദൈവം അതൊക്കെ കാണും. നന്ദിയില്ലായ്മ കാണിച്ചു എന്നു തോന്നരുതല്ലോ.

പിന്നെ? എന്തൊക്കെയുണ്ട് വിശേഷംസ്? എല്ലാവർക്കും സുഖം തന്നെയല്ലേ? ഞാനോ?...ഓ...അങ്ങനെയൊക്കെയങ്ങ് പോകുന്നു. അപ്പോ ശരി. നിങ്ങളൊക്കെ ഭയങ്കര തെരക്കിലായിരിക്കുമല്ലോ. ശല്യം ചെയ്യുന്നില്ല.

ദൈവമേ...എന്റെ കേരളം

എന്റെ നാട്... ഉടനെത്തന്നെ അത് പഴയപോലെ സുന്ദരമാവുമെന്ന പ്രതീക്ഷയുണ്ട്. ജനങ്ങളൊക്കെ കൂടുതൽ കരുത്തരായും, നന്മയുള്ളവരായും,  സന്തോഷമുള്ളവരായും മാറട്ടെയെന്ന പ്രാർത്ഥനയുമുണ്ട്. ഓരോ അനുഭവങ്ങളും, ചെറുതായാലും വലുതായാലും, തിരിച്ചറിവു നൽകുന്നുണ്ട്. ആ തിരിച്ചറിവിലാവട്ടെ ഇനി മുന്നോട്ടുള്ള യാത്ര. എല്ലാവരെയും ദൈവം രക്ഷിക്കട്ടെ.

ജടായു സംഗമം

അദ്രിശൃംഗാഭം തത്രപദ്ധതിമദ്ധ്യേ കണ്ടു
പത്രിസത്തമനാകും വൃദ്ധനാം ജടായുഷം
എത്രയും വളർന്നൊരു വിസ്മയം പൂണ്ടു രാമൻ
ബദ്ധരോഷേണ സുമിത്രാത്മജനോടു ചൊന്നാൻ:-
“രക്ഷസാം പ്രവരനീക്കിടക്കുന്നതു മുനി-
ഭക്ഷകനിവനെ നീ കണ്ടതില്ലയോ സഖേ!
വില്ലിങ്ങുതന്നീടു നീ ഭീതിയുമുണ്ടാകൊലാ
കൊല്ലുവനിവനെ ഞാൻ വൈകാതെയിനിപ്പോൾ.”
ലക്ഷ്മണൻ തന്നോടിത്ഥം രാമൻ ചൊന്നതുകേട്ടു
പക്ഷിശ്രേഷ്ഠനും ഭയപീഡിതനായിച്ചൊന്നാൻ:
“വദ്ധ്യനല്ലഹം തവ താതനു ചെറുപ്പത്തി-
ലെത്രയുമിഷ്ടനായ വയസ്യനെന്നറിഞ്ഞാലും
നിന്തിരുവടിക്കും ഞാനിഷ്ടത്തെ ചെയ്തീടുവൻ
ഹന്തവ്യനല്ല ഭവദ്ഭക്തനാം ജടായു ഞാൻ”
എന്നിവ കേട്ടു ബഹുസ്നേഹമുൾക്കൊണ്ടു നാഥൻ
നന്നായാശ്ലേഷം ചെയ്തു നൽകിനാനനുഗ്രഹം
“എങ്കിൽ ഞാനിരിപ്പതിനടുത്തുവസിക്ക നീ
സങ്കടമിനിയൊന്നു കൊണ്ടുമേ നിനക്കില്ല
ശങ്കിച്ചേനല്ലോ നിന്നെ ഞാനതു കഷ്ടം! കഷ്ടം!
കിങ്കരപ്രവരനായ് വാഴുക മേലിൽ ഭവാൻ

മഴ

എന്തൊക്കെയുണ്ട് വിശേഷങ്ങൾ? എല്ലാവർക്കും സുഖം തന്നെയല്ലേ? ഇവിടെ മഴയാണ്. പിന്നെ ഫുട്ബോൾ ലോക കപ്പും. ;)
നിപ വൈറസ്സിനെ തുരത്തിയോടിക്കാൻ ഒരുമിച്ചു പ്രവർത്തിച്ച എല്ലാവർക്കും എന്റെ സ്നേഹം. ആദരവും.
പിന്നെ....ഒന്നുമില്ല.

ചൂടുകാലം

അഞ്ച് എന്നൊരു തലക്കെട്ട് ആയിരുന്നു വേണ്ടത് അല്ലേ? പക്ഷേ ഇപ്പോ സന്ദർഭത്തിനു പറ്റിയ തലക്കെട്ട് ഇട്ടതാണ്. എനിക്കു സുഖം തന്നെ എന്നു പ്രത്യേകം പറയേണ്ടല്ലോ.  പരമസുഖം. അതോണ്ട് എല്ലാവർക്കും അങ്ങനെയെന്നു കരുതുകേം ചെയ്യുന്നു. മഴ വന്നോ? എന്തു പറയുന്നു? കണ്ടാൽ എന്റെ അന്വേഷണം പറയണം. സിനിമ കണ്ടു. പുസ്തകം വായിച്ചു. യാത്രേം പോയി. എല്ലാം കൂടെ ഒത്തുവരുന്നത് കുറഞ്ഞിരുന്നു. അപ്പോ ശരി. എല്ലാവരും സുഖമായിരിക്കൂ. എല്ലാവർക്കും സ്നേഹം.

നാല്

വിഷു കഴിഞ്ഞു. മോശമല്ലാത്ത വിഷുക്കാലം ആയിരുന്നു. യാത്രയും ആയിരുന്നു. ചക്ക, മാങ്ങ, എന്നിവയുടെയൊക്കെ കാലമാണ്. കടുത്ത ചൂടുകാലവും. അങ്ങനെയൊക്കെ കഴിഞ്ഞുകൂടുന്നു.

നിറമുള്ള ചിത്രങ്ങൾ, നിറം ചാലിച്ച് പൊലിപ്പിച്ച് എഴുതിയ എഴുത്തുകൾ, ഒരുപാട് വായനക്കാർ,  ഇതൊക്കെയുള്ള ഇക്കാലത്തെ പലയിടങ്ങളിൽ നിന്നും ഈ ബ്ലോഗിലെത്തുമ്പോൾ ഒരു നിറം മങ്ങൽ തോന്നുന്നുണ്ടല്ലേ?

മൂന്ന്

കൂട്ടുകാർക്ക്,
പ്രിയപ്പെട്ട കൂട്ടുകാർക്ക് എന്ന് സംബോധന ചെയ്തില്ലെങ്കിൽ ആരും പരിഭവിക്കില്ലല്ലോ അല്ലേ? എന്റെ കൂട്ടുകാരൊക്കെ എനിക്കു പ്രിയപ്പെട്ടവരാണ്. മാർച്ച് മാസം ആയി. ചൂടു തുടങ്ങി, മഴ തുടങ്ങി. ഇതൊക്കെത്തന്നെ. പലരും ഒഴിവുകാലയാത്രകൾ പ്ലാൻ ചെയ്തും തുടങ്ങി. അല്ലേ? വായന അത്ര ഉഷാറായിട്ടില്ല.  അതുകൊണ്ട് അതിനെക്കുറിച്ചൊന്നും എഴുതാനില്ല. വല്യ യാത്രകളൊന്നും ചെയ്തില്ല. അതുകൊണ്ട് അതിനെക്കുറിച്ചും പറയാനില്ല. പിന്നെ സിനിമ. അതുണ്ട്. പക്ഷെ, പിന്നെയെപ്പഴെങ്കിലും എഴുതാം. 

നമ്മളെ അറിയുന്നവരോട്, മനസ്സിലാക്കുന്നവരോട് ഒന്നും പറയേണ്ട കാര്യമില്ലെന്നും, നമ്മളെ അറിയാത്തവരോട്, തെറ്റിദ്ധരിച്ചുകൊണ്ടിരിക്കുന്നവരോട് ഒന്നും പറഞ്ഞിട്ടു കാര്യമില്ലെന്നും ആരായിരിക്കും ആദ്യം പറഞ്ഞിട്ടുണ്ടാവുക?

എന്തായാലും എല്ലാവർക്കും ദൈവം നല്ലതുമാത്രം വരുത്തട്ടെ എന്നു പ്രാർത്ഥിക്കുന്നു. :)

രണ്ട്

24 മണിക്കൂറും നിങ്ങളോടൊക്കെ എന്തെങ്കിലും മിണ്ടീം കൊണ്ട് ഇരിക്കണം എന്നു ഞാൻ വിചാരിക്കും. പക്ഷേ, നിങ്ങളൊക്കെ വളരെ തെരക്കുള്ള മനുഷമ്മാരായിപ്പോയില്ലേ? “നിനക്കൊന്നും വേറെപ്പണിയില്ലല്ലോ” എന്ന് ഞാനങ്ങനെ മിണ്ടീം പറഞ്ഞും ഇരിക്കാം എന്നു പറയുമ്പോ നിങ്ങളു നേരിട്ടു പറഞ്ഞിലെങ്കിലും മനസ്സിലെങ്കിലും പറയും. പക്ഷേ നിങ്ങളുടെയത്ര തെരക്കില്ലെങ്കിലും എനിക്കും തെരക്കുണ്ട്. ഹും. ഓരോ വർഷം വരുമ്പോഴും ജനുവരീൽ പലതും തീരുമാനിക്കും. ഫെബ്രുവരീൽ അത് ഓർമ്മിക്കും. മാർച്ചൊക്കെയാവുമ്പോഴേക്ക്, പിന്നേ....തീരുമാനം! ഒലയ്ക്ക്യാണു എന്നും പറയും. ഇതൊക്കെ പലരുടേം ജീവിതത്തിൽ നടക്കുന്നതാണ്. ചിലർക്ക്, പിന്നെ ജനുവരി, ഫെബ്രുവരി, പുതിയ വർഷം എന്നൊന്നുമില്ല. അവരിങ്ങനെ ചീഞ്ഞും ചതഞ്ഞും കെടക്കാണ്ട് ജീവിതം വളരെ സംഭവബഹുലമാക്കും. മറ്റുള്ളോരെ സഹായിക്കും, ആർക്കെങ്കിലും ഉപകാരമാവുന്നത് ചെയ്തോണ്ടിരിക്കും, അതിന്റെ കൂടെ സ്വന്തം കാര്യങ്ങളും നടത്തും. ഞാനൊന്നും അങ്ങനെ വിചാരിച്ചിട്ടു കാര്യമില്ല. സ്വന്തം കാര്യം തന്നെ മര്യാദയ്ക്കു നടത്തിക്കൊണ്ടുപോവാൻ പറ്റണേന്നേയുള്ളൂ പ്രാർത്ഥന. നിസ്സാരജന്മം! പിന്നെ ആർക്കും ഉപകാരം ചെയ്തില്ലേലും ഒരു ഉപദ്രവോം ചെയ്യുന്നില്ലല്ലോന്നു വിചാരിക്കാം, “അപ്പോ ഈ ബ്ലോഗെഴുത്തോ?” എന്നു നിങ്ങൾ ചോദിക്കുന്നതിനുമുമ്പ് സ്ഥലം വിട്ടേക്കാം.നന്ദി! നമസ്കാരം!

ഒന്ന്

പുതിയ കൊല്ലത്തിലെ ഒരു മാസം കടന്നുപോയിരിക്കുന്നു എന്നുതന്നെ പറയാം. നല്ലതായിരുന്നോ ചീത്തയായിരുന്നോന്നു ചോദിച്ചാൽ രണ്ടുമായിരുന്നെന്നു പറയും. സുഖദുഃഖസമ്മിശ്രം. എന്താന്നു ചോദിച്ചാൽ ഒന്നും പ്രത്യേകിച്ചു പറയാൻ പറ്റില്ല.

യാത്ര പോയി. പണ്ടു പോയിടത്തേക്കു തന്നെയാണ്. പക്ഷേ വേറെ നാടാണ്, ഭാഷയാണ്. പുസ്തകം വായിച്ചു ചിലതൊക്കെ. ചില സിനിമകൾ കാണാൻ തയ്യാറായി ഇരിക്കുന്നു. അടുത്തുതന്നെ പോവും.

ഇക്കൊല്ലം വസ്ത്രങ്ങൾ വാങ്ങുന്നത് വളരെക്കുറയ്ക്കും എന്നു വിചാരിച്ചിരുന്നു. ആ തീരുമാനം ജനുവരിയിൽത്തന്നെ പൊളിഞ്ഞു. അടുത്ത മാസങ്ങളിലുമൊക്കെ ശ്രമിക്കാവുന്നതാണ്. എന്നാലും അതും വെറും ശ്രമം മാത്രം ആയിപ്പോവുമോന്നറിയില്ല.

ജീവിതത്തെക്കുറിച്ച് കൂടുതൽക്കൂടുതൽ അറിഞ്ഞുകൊണ്ടിരിക്കുന്നു. പല കാര്യങ്ങളും പഴയതുപോലെ നിങ്ങളെയൊക്കെ ബോറടിപ്പിച്ച് ഇവിടെ ഇടണം എന്നുവിചാരിക്കും. പക്ഷെ ആകപ്പാടെയൊരു മന്ദത. എന്തിനാന്നൊരു തോന്നൽ. (ഒരാളെന്നെ വാട്സാപ്പിൽ ബ്ലോക്കുചെയ്തതോണ്ടല്ല. ഹും!)

എല്ലാവരും സന്തോഷമായി ഇരിക്കീൻ. (എന്നെപ്പോലെ).